ဆီဟီုအရေဝ်မှ···

ဆီဟီုအရေဝ်မှ···

ကမၠောန်တ္ရဲဏံလဂါံဇိုၚ်တ္ရဲဏံဂှ် ဒှ်ဇွောံမသွက်တ္ရဲယးသွက်အနာဂတ်ဟေၚ်ရ။ ပြဲနူတ္ရဲဏံ ခိုဟ်နူတ္ရဲဏံ တၟေၚ်နူတ္ရဲဏံဂှ်ဟၟဲ။ တ္ရဲဏံဂှ် ဒှ်မံၚ်ပ္ဍဲကာလ ပစ္စုပ္ပန်တုဲ ဒၞာဲဝွံ ဒှ်ပွမခိုဟ်သွက်ဂွံကေမ်ဇျာပ်အခေါၚ်အရာ ဒှ်ပွမခိုဟ်သွက်ဂွံဖျေံသ္ဇိုၚ် ရိုဟ်ကၞက် ဒှ်ပွမခိုဟ်သွက်ဂွံပတိတ်ဇြဟတ် လွဳပရာက္ဍဟောဝ်ၜှ်ကေတ် တိုၚ်ပ္ကဴတေံရ။

ပ္ဍဲတ္ရဲဏံ ပ္ဍဲပစ္စုပ္ပန်လၟုဟ်ဂှ် ပိုဲတံယဝ်ဟွံချဳဒရာၚ် ဟွံဖျေံသ္ဇိုၚ်ရိုဟ်ကၞက် ပိုဲတံ ယဝ်ချူဓဇက်ခရက်ဖျေံ အစဳအဇန်တှ်ေ ခတှ်နူကနေံတေံ ပိုဲလေဲဟွံပြေ သွက်တ္ရဲယးတေံလေဝ် ဇြိုၚ်ဂွံဆက်တရဴ ဆီကောန်တၟံ ကၠေၚ်က္ဍဟ်လေဝ် ဍေံဟွံကတဴဂဵု ညံၚ်တၠဝေဒနာမွဲ စိုတ်ဓာတ်ဒှ်အာယဲတုဲ အရာမိက်ဂွံဂွံ အရာမိက်ဂွံဒှ် အရာမိက်ဂွံကေတ် အရာမိက်ဂွံပိုၚ် ၜိုန်တီဆဵုညာတ်မံၚ်ကီုလေဝ် နွံဆၜိုတ်ဒတူဗဵု ဗၞတ်ဆၜိုတ်ဂဇံလှၚ်ၚ္ရုၚ်မံၚ်ဓဝ်ရ။

ပ္ဍဲပေါဲဗတိုက်မွဲမွဲ စိုတ်ဓာတ်ဟွံကြံၚ်မ္ရိုဟ်တှ်ေ လတူကမၠောန်မွဲမွဲ သ္ဂုတ်သွာတ်ဟွံပိုတ်သ္ဂုတ်မ္ဂး အခိၚ်အိုတ် အခေါၚ်လီု ဒးကပိုက်မံၚ်ယွီုတွဵုတုဲ ဒိုဟ်လဵုအာအာ မုက်မတ်ဒးသဝ် ဒးမံၚ်ပြာပ်ဗဒါလၟိုန်ရ။ လစွံစိုတ်တိုၚ်ပ္ကဴမွဲမွဲ ယဝ်ဟွံပၠုပ်စိုတ် သ္ပထောံဗွဲမဇ္ဇျဟ် ဗွဲဥပေက္ခာဓဝ်တှ်ေ တၚ်ရန်တၟံပိုဲတံလေဝ် ဂွံဍိုက်ပေၚ်ဟွံလောဲသွာရ။ဂၠမ်သြိုဟ်ဟွံမြဟ်မြဴ စိုတ်ဓာတ်ခ္ဍအ်ကဝေန် ဆီလေဝ်ဂံက်ဂဟေင်အာရ။ ကြက်ဂလာန်တၠပညာမၞုံယၟု Jackson Brown Jr ညးဟီုလဝ်နွံမွဲဂှ်-( The best preparation for tomorrow is doing your best today) သွက်ပရေၚ် ပဠေဝ်ပဠေတ် ခိုဟ်အိုတ်တ္ရဲယးတေံဂှ် မၞးမကၠောန်သ္ပအရာခိုဟ်ဟ် ပ္ဍဲတ္ရဲဏံညိ။

ရံၚ်ကဵုကြက်ဂလာန်လတူတေံတုဲ ကောန်ဂကူပိုဲမန်တ္ရဲဏံ မုဒးကၠောန် မုဒးဗတောန် မုဒးဖျေံအစဳဇန်ရောဂှ် ပိုဲတံဒးတီထေက်ရ။ အကာဲအရာကောန်ဂကူမန်ပိုဲတ္ရဲဏံ လညာတ်အဲမၞိဟ်ချူလိက်ဏံမွဲ ယဝ်ဒးဟီုဏောၚ်တှ်ေ ဇြဟတ်ဂကောံ တၚ်ဏှဟ်ညဳသာ နဲကဲတၠုၚ်လအာ ပါ်ပရဟ်ယိုက်ဂၠေၚ်မွဲစွံမာန်ဂှ် နွံပၟိက်ဗွဲမလောန်ရ။ပွမသ္ရဳဂၠိပ်မၠာ်မတ်တုဲ ကၠေၚ်က္ဍဟ် ပရေၚ်သ္အးဇ္ရးဆီဂှ်လေဝ် နွံပၟိက်ဗွဲမလောန်ရ။ အဓိက ကု သာမည ဒးပါ်ပါဲတုဲ ဃောတတ်မံၚ်တရဴ ကန္တာ ဃောအာမံၚ်အကြာလဗိုတ်ကျာ ဆီညံၚ်ဂွိုဟ်ဒှ်ယဲဂြိုဟ်ကေန်သာ (cancer )ဂှ်လေဝ် ဒးစွံသတိဇၞော်ဇၞော်ရ။

ပ္ဍဲပ္ရံက်ပရေၚ်ဍုၚ်ကွာန်တ္ရဲဏံ ဗီုကလိုက်ကၟဵုထုဲထံၚ် ပၟတ်ဂဵုထၞာန်မံၚ်အလုံဂၠးကဝ်ဏံ နဒဒှ်ကောန်ဂကူမန်မွဲဒးစွံအာရီု ဗွဲမစုန်ဝုန်ရ။စၚ်ပရေၚ်ဍုၚ်ကွာန်တ္ရဲဏံ ထိၚ်ဒဝ်မိက်ဂွံဟီုဟီု ပံက်လဟာ်မိက်ဂွံသဂးသဂး ဝၚ်ဂကူဇကု ညံၚ်ဂွိုဟ်စိုပ်အာတိုက်ထၜးပျး (museum )အာဲကၟာဲဂကူဇကု ညံၚ်ဂွိုဟ်ကၠာဲကၠေံကၠက်အာဂတမတ် အနာဂတ်ဂကူဇကု ညံၚ်ဂွံတၟးဇး ကောန်ဂကူဇကု ဘဝဂွံဗၠးၜးဗၠးၜး စိုတ်ဓာတ်ပၠန်ဂတး ညံၚ်ဂွံနွံညံၚ်ဂွံပေၚ် ညံၚ်ဂွံဇွောဝ်ဗက်ဇာပ်လုပ်အာ ဖျုန်ၜဝ်ဇုတ်ဂှ် ဒးဟီုအရေဝ်ကဵုဆီလတေၚ်ဟေၚ်ရ ဆီလပကဵုဒှ်အာပတိုဟ်ညိ။

ဇုက်လလဳတၟးမွဲလစုတ်ဂှ် ဟွံဒှ်လျးအရံၚ်ဂကူပိုဲပုဟ် ဟိုတ်ဂှ်ရ ပ္ဍဲတ္ရဲဏံ ကောန်ဂကူမန်ပိုဲ ဒလွဳပရာၜံၚ် ပ္တိတ် စိုတ်ဓာတ် မတွံဂး ဂံၚ်ကဵုကဍိုပ် ဂံၚ်ဒုၚ်ပံၚ်ကောံ ဂံၚ်ကေတ်တာလျိုၚ် ဂံၚ်တဝ်စၞေဟ် ဂံၚ်ဓမံက်ဓဝ်ဍာံ ဂံၚ်ဂါံဆက်ဂၠောံ ဂံၚ်ကေတ်ပေါဲအံၚ်ဇၞးရ။ပိုဲတံယဝ်ပြးဇး တၚ်ဓဝ်ပတှ်ေဟၟဲ မွဲကုမွဲ ယဝ်ဟွံဇြိုဟ်နက် ဟွံဗိုန်ဗတ်မဂး (ဝါ) ဆီယဝ်ဟွံဟီုအရေဝ်မဂး ညံၚ်ပှ်ၜိုၚ်ဒြာဲ ဒးဒုၚ်သ္ရာဲကဵုကၠဇာဒိသိုၚ် ညံၚ်လုပ်စိုပ်အာဗွိုၚ်ကၠန် ဒးဒုၚ်ၚိတ်ဏာကဵုဂကူတၞဟ်ဂျိုၚ်ၚ်ရ။

ယင်ပူဂဵုမွဲမွဲဂကူမွဲမွဲ ဟိုတ်ဒးဒုၚ်ဘပဠဟိုတ်ဒးဒုၚ်ဍဵုဍိုက် ဟိုတ်ဒးဒုၚ်ပကီုပရာပ်ဂှ်- ၁။ ဒၟာနူဟွံညဳသာကောံသၟဟ်ဒှ်မွဲ ၂။ ဒၟာနူဇြဟတ်လွဟ်လနက်ဂကူ ဍိုန်လျ ၃။ ဒၟာနူလၟိဟ်မၞိဟ်ကောန်ဂကူအောန် ၄။ ဒၟာနူစိုတ်ဓာတ်သာသ္ပံတုဲ အောန်ကဵုဗျူဟာသွက်အနာဂတ် ၅။ ဒၟာနူလညာတ်ဍာတုဲ မိၚ်လဟိၚ်ၜက်လောန်အာ ၆။ ဒၟာနူစိုတ်ပြေဒုၚ်မံၚ်တဲဲမုဒှ်ဒှ်တုဲ ဖေက်ဂၟံက်ဟွံဂံၚ်ရုန် ဂ္စာန် ရ။ ဒၟာ နူဆီဟွံဟီုအရေဝ်ဏီ မဒှ်ရ။

နိယာမသဘာဝလောကဓမ္မတာ ကဏ္ဍလဵုရံၚ်ၚ် ဝၚ်လဵုဗှ်ဗှ် မုက်လိက်လဵုပံက်က် ဓယံက် ကု သၞိၚ်ပါ်ပါဲတော်ဆချပ်ဗစာဟွံဒးတှ်ေ ညံၚ်ရဴကော်ဘိက်ဒုၚ်တၠုၚ်မံၚ်အန္တရာဲလမျီုဂကူ လမျီုဇကုကီုရ။

အခိၚ်ဏံတ္ရဲဏံ ပိုဲတံကလေၚ်လ္ရတ်ဂၠိုက်ဂၠာဲ သ္ပသုတေသန ပရေၚ်လိုက်ပရောမနုဿ ကေုာံ ကၟိန်ဍုၚဘာသာဂကူမဂး ဇြဟတ်ဇၞော်ဇြဟတ်ဍောတ် ဍုၚ်ဇၞော်ဍုၚ်ဍောတ် ညံၚ်ကဵုဒှ်မံၚ်အဓိကဟွံသေၚ် ဂွံဆဵုညာတ်ကေတ်ရ။ ဒဒှ်ဍာံပကတိရုပ် ပြာကတ်ဒၟံၚ်ပြဟ်ဟ်ဏံ ဇြဟတ်ဂကောံ ဇြဟတ်ဆီလတေၚ် ဇြဟတ်မဟာမိတ် တၚ်ပတဝ်ကဍိုပ် ၜိုတ်လဵုနွံရောဂှ် လတူနူဂှ်ဝွံ ဆန္ဒဗျဵုတဟၚ်ဟေၚ်။ စိုတ်ဓာတ်ရုန်ဂစာန်ဂှ် ဒှ်မံၚ်အဓိကဇၞော်အိုတ်ရ ဥပမာကြပ်ပ်ဏံ ဗီုဂကူရခေၚ် ကေုာံ ဂကူအေဿရေတံ လုပ်မံၚ်ပေါဲဗတိုက်လၟုဟ်ဂှ် ဒှ်ခန်ဗ္တောန်ခိုဟ်မွဲ ဂွံလ္ရတ်ရံၚ် ဗွဲမကၠးဖ္ဍးမာန်ရ။

အစောန်စရာဲဍာ်ဒကေဝ်ၜိုတ်လဵုနွံနွံ ဗျုဟာပြယာဲၜိုတ်လဵုဇြိုဟ်ဟ် လွဟ်လနက်ဂတာပ်ခေတ်ၜိုတ်လဵုဂၠိုၚ်ၚ် ပိုဲတံဖအိုတ် မွဲစိုတ်မွဲဖျုန်မွဲကၟဝ်မွဲလတေၚ်မွဲဆီ ယဝ်ဟွံဒှ်ပုဟ်တှ်ေ အလုံကောန်ဂကူ ဟွံဒှ်မွဲဂကောံပုဟ်တှ်ေ ဟီုတွံမံၚ်ပကောံပကေဝ်မံၚ် သဳကၠဳမံၚ်ဂှ် ညံၚ်ရဴပၟပၠာ သိုၚ်မံၚ်သ္ရိလတူကျာကီုရ။ နတ်ထိ ဘန္တေရ။

ဟွံညဳသၟဟ်တှ်ေကလှ်ဒကးလောဲ ရံၚ်ကဵုဂလာန်ဏံတုဲ ဗီုကၟိန်ဍုၚ်ဇၞော်အမေရိက ဟိုတ်နူကဵုဗော်ဇၞော် (Republican ကု Democrat) ၜါလ္ပာ် ဒစဵုဒစးစဵုကဵုဒကးပရး ဒစဵုဒစးစဵုကဵုဇြဟတ်ဂကောံ ဇြဟတ်ညဳသၟဟ်လီု ဒစဵုဒစးၜက်နူဗၞတ်ဗ္ၜတ်တုဲ နူသၞမွဲလ္ပာ်တေံ နူမဟာမိတ်ပတောံကေုာံ နူညးမကၠတ်ရံၚ်မံၚ်ဂွန်မွဲလ္ပာ်တေံ ဆဵုညာတ်အာပၞော်ပထောၚ် ဒၞာဲဇိၚ်နာပ်လဝ်ဗွဲမလောဲသွာရ။မွဲဂကောံ ကု မွဲဂကောံ ကယျာန်ဓဝါတ်ဟွံဒှ်ဂုဏ်ဖဵုသွက်ဍုၚ်သွက်ဂကူပုဟ်တှ်ေ ဒၞာဲလဵုဒှ်ဒှ် အခိၚ်လဵုဒှ်ဒှ် ပေါဲလဵုဒှ်ဒှ် စၚ်လဵုဒှ် ဆက်အာဟွံထေက် ဒေါံထောံတှ်ေဂုဏ်ဖဵုပြဲ ဂုဏ်ပရဲဂၠိုၚ်ရ။

ဇေတ်ဍာံတေံဝွံ ဗီုကၟိန်ဍုၚ်ဇၞော်အမေရိက ဒက်ပတန်လဝ်သၞောဝ်သဇိုၚ်ဥပဒေ ဗီုလးပၠးလဝ်အခေါၚ် ကေုာံတရဴအနာဂတ် ဖျေံလဝ်ရိုဟ်ကၞက် ပရေၚ်စဵုဒၞာ ကေုာံ ပရေၚ်ဂီုကၠီုဂှ် နူသၞလဵု ပူဂဵုလဵု နူဍုၚ်လဵုမွဲ ဂွံကေတ်ဇၞး ဂွံပၠံၚ်ၜး ဂွံဗတိုက်ညးတံမာန်ဂှ် ဟွံလောဲသွာရ။ဆဂး ဟိုတ်နူဗော်ဇၞော် ၜါလ္ပာ်တံပြိုၚ်ပကာန်အတ္တ စၞောန်လပှ်ေတဲ ထ္ၜးဒုဟ် မ္ရုဟ်ဒေါသလောန်ကာဲအာတုဲ ဇီုကပါ်လုပ်ဇြဟတ်ဂကောံ ဇြဟတ်ညဳသၟဟ် ဇြဟတ်ဆာန်ကၟိန်ဍုၚ်ရ။ ဣဏံဂှ် ဒှ်လက်သန်လ္ပာ်အနုက်တုဲ ဇာတာ ညးဍုၚ်ကွာန်လေဝ် ဒှ်နိမိတ်လ္ပာ်ပရေံရ။ဟွံပြံၚ်သၠာဲမွဲသာ် အတိုၚ်ဏံ ယဝ်ညးတံဆက်အာမဂး အနာဂတ်တေံ ညးတံကြက်ကလိဂွံ ခန်လ္ရတ်ဇၞော်ဇၞော်ဏောၚ် ညာတ်ကေတ်ရ။

နကဵုဇြဟတ်ဂကောံဝွံ ဗဒေါမ်ဒဵုသိန္နရာတ် ဇြဟတ်ညဳသၟဟ်ဂှ် သာတ်ၜဳမှာသၟိတ်မာန် ဂလာန်ဝွံနွံမံၚ်သေၚ်ဟာ။ကောန်ဂကူပိုဲ ယဝ်ဟွံဒှ်မွဲဂကောံ လညာတ်ပိုဲ ယဝ်ဟွံဒှ်မွဲပၠုပ် ဖျုန်ကောန်ဂကူပိုဲ ယဝ်ဟွံဒှ်မွဲကလောံ ဆီကောန်ဂကူပိုဲ ယဝ်ဟွံဒှ်မွဲလတေၚ်မ္ဂး အရာပွပိုဲမစၟဳမံၚ် အၚောပ်မံၚ် ကေတ်မံၚ်ဘဝဗၠးၜး အခေါၚ်သၠးပွး ပွမချပ်မံၚ်တွံမံၚ် ကြီုဇာမံၚ် ကမ်ကုသဵုမန် မန်ဖန်ကေတ််တ်ဂှ် တုပ်သၟဟ်ကဵု အၚောပ်စမံၚ် ဖျုန်နာ်ဖျုန်သပဝ်ကီုရ။ဂွံစဂွံစမ်ရှ်ဂှ် ဇြိုၚ်သန်ဗွဲမလောန်ရ။

ပဋိပက္ခ ပြသၞာဒိုဟ်ဇဳ ကလိုက်ကၟဵုမံၚ်ပဍဲဂၠးကဝ် ပစ္စုပ္ပန်တ္ရဲဏံဂှ် နနဲၜတ်တ်ကြံၚ်ၚ် ညးတံရပ်စပ်မံၚ်ရ။ဇြဟတ်ဂကောံညးတံ ညံၚ်ဂွံသပ္ပါဲ ဂွံဆာဲတိုန်ဂှ်လေဝ် ညးတံထိၚ်ဒဝ်လွဳပရာမံၚ်ရ။ ကၠာ်ညံၚ်ဂွိုဟ်လုပ်စိုပ်အကြာညးတံဂှ်လေဝ် ညးတံမၠာ်လဝ်မတ် ပံက်လဝ်ကတောဝ်ရ။ညံၚ်ရဴသာ်ဂှ်ကီု ပဍဲပွဳပွူဝုတ်ဒိုဟ်သ္ရိရေၚ်ကၟေၚ်ဆက်ကောန်ဂကူပိုဲတံဂှ် ဟိုတ်နူဒးဒုၚ်အုပ်ဓလီုလဝ်လံလ ဒဒုၚ်ဘပဠလဝ်နနဲစုၚ် ဒးဒုၚ်ၜုၚ်ပၠုပ်လဝ် ပဍဲက္ဍဟ် ပ္ဍဲဂြိုဟ် ပဍဲဆီလတေၚ်တုဲ စိုတ်ဓာတ်ရုန်ဂစာန်ဍိုန်လျ စိုတ်ဓာတ်လ္ရပၟတ်ဂြုဲ မအရေဝ်ဆီလေဝ်ဟွံမိက်ရုဲဟီု ဗီုပြၚ်သိုၚ်ခၞံလေဝ်ဟွံမိက်ဓဇက် ဂွံဒက်ပတန်က္ဍိုပ်သ္ကိုပ်ဂကူဂှ် ဇြိုၚ်မံၚ်ညးသ္ကံရ။

Where there is unity there is always victory. ဇြဟတ်ညဳသၟဟ်ဂှ်ဖန်ဗဒှ်ကဵုတိုၚ်ပကဴရ။ အကာဲအရာကောန်ဂကူပိုဲတ္ရဲဏံ တၠုၚ်လအာကောန်ဂကူပိုဲတ္ရဲဏံ ဗျူဟာမိက်ဂွံဟီုဟီု ဍာ်ဓလာဲမိက်ဂွံဂးဂး တၚ်ညဳသၟဟ်ဍိုန်လျ ၚ္ရုဟ်မးဓဝ်ပတှ်ေအောန် စောန်မံၚ်ဆပူဂဵုမွဲဓဝ်ရတှ်ေ ဇြိုၚ်ဂွံတတ်ၜက်အာပ္ရံက်ဏံရ။ အရာပိုဲတဝ်စၞေဟ်မံၚ်တ္ရဲဏံ ပွမပိုဲလုပ်မံၚ်ပေါဲဗတိုက်တ္ရဲဏံ ဗီုဗီုဏံ တၚ်ခလံက်ဒၞက်ပိုဲံဂၠိုၚ်မံၚ်မဂး (ဝါ) တၚ်ဆုတ်ယောၚ်ပိုဲဂၠိုၚ်မံၚ်မဂး ဇၟာပ်ပိုဲမဂါံကွာ် ဇိုၚ်ဟလိုၚ်အာမာန်ရ။ မွဲလပါ်တေံ ဗီုဍေံပဠေဝ်ပဠေတ် ဒက်ပတန်လွဟ်လနက်ဂတာပ်ခေတ် ဗီုဍေံစန်ဒက်ပကောံဇြဟတ်နဲတၟိ ဗီုဍေံကြံၚ်မ္ရိုဟ်ကီု သီုဍေံကြီုကြဝဵုစၞာဲ ညိဟွံညှာရောၚ်ဓညဂှ် ပိုဲတံပ္ဍဲကာလပစ္စုပ္ပန်လၟုဟ်ဏံ ဂွံလုပ်ပေါဲဲဗတိုက်ကဵုဍေံမာန် ဂွံပဴိုၚ်ပကာန်ကဵုဍေံဂှ် ဒးဟီုအရေဝ်ကဵုဆီဟေၚ် ဆီ···ယဝ်ဟွံဟီုအရေဝ်ပုဟ်တှ်ေဆီ···ယဝ်ဒှ်မံၚ် cancer ဏောၚ်တှ်ေ ဂွံလုပ်ပေါဲဗတိုက်လ္ပဟီုဏီ ဂွံဆဝ်မ္ရုဟ် ဂွံဒက်ပတန်ဂကောံ ဂွံပံၚ်တောဲ ဂွံတက်ကဍိုပ်စှ် ဂၞန်မွဲဂှ် ဟွံလောဲသွာရ။ဟိုတ်ဂှ်ရ ဂကူပိုဲဂွံတိတ်ဗၠးနူဘဝဍိက် ကောန်ကသအ်ဍေံနွံမွဲဟေၚ်ရ ဆီဟီုအရေဝ်မှ··စိုပ်တရဴအံၚ်ဇၞးမာန်ရောၚ် အဲမ္ဒးပ္တိုန်ထ္ၜးဏာရအဴ။

လွဳသစ္စာ