ဂၠံၚ်တရဴဟံသာ ဂၠုမံၚ်ယျဏး

ပ္ဍဲကဵုဗွဝ်ကၠံ (၂၁) ဏံ ဂကူမန်ပိုယ်တံ ဒးဆဵုဂဗမံၚ် အခါအန္တရာယ် ညံၚ်ရဴမတ်ဗြဲဂၠု ဒမၠုအခိၚ်ဗ္တံ ဟွံမွဲကဵုလျးအရံၚ်တုဲ ဂၠံၚ်တရဴဟံသာ ဂွံကလေၚ်စဴဍုၚ်မန်ဂှ် ဒှ်တၚ် (ကော်ချဴ) ” Challenge “ ဇၞော်ကဵုဇြဟတ်ရောၚ် ဒးဟီုရ။တၚ်ဏံဂှ် ရံၚ်မံၚ်ဗေဒၚ် တော်မံၚ်မၚ်ဇေန် ဟွံသေၚ်၊ ဗွဲတၟေၚ် ပရေၚ်ဍုၚ်ကွာန်တ္ၚဲဏံ ဟံသာဂွံကလေၚ်စဴဍုၚ်မန်ဂှ် တရဴဂၠုမံၚ်ဏီရ။ ဟိုတ်ဂှ်ရ ခါတ်ကေတ် အကာဲအရာပရေၚ်ဍုၚ်ကွာန် ကၟိန်ဍုၚ်မန်ဗၟာ ကဵု အကာဲအရာသၟာပၠန်ဂတးတံမ္ဂး သွဟ်ဍေံ က္တဵုဒှ်မံၚ် အတိုၚ်ဗွဲသၟဝ်ဏံရ။

နကဵုမဟာဗျူဟာ (Policy) ပရေၚ်ဍုၚ်ကွာန် နူကဵုဍုၚ်မန်ဗၟာ ဂွံဗၠးၜးသၟဝ်တဲအင်္ဂလိက်တုဲ ကဝ်ဒူလေဝ်တံ ဓဇေက်လဝ်သၞောဝ်တိဍာ် နူဍုၚ်သဓီု စဵုကဵုစိုပ် ရးတၞၚ်သြဳရ။ ပွိုၚ် (၇၀) သၞာံပြၚ်ၚ်ဏံ ညးတံဖျေံမံၚ် သ္ဇိုၚ်တိဍာ် နကဵုအသိၚ်ဒပ်ပၞာန် ကေုာံ ပရေၚ်အုပ်ဓုပ်တိဍာ်နတဲ နဇိုၚ် ဍာံဍာံပြပြရ။ လ္တူ Policy ဂကူညးတံဏံ ယဝ်ရ မန်ပိုယ်(သာသ္ပံ) စွံစိုတ်လဟိၚ် ဝိဝိၚ်မံၚ် လ္တူပရေၚ်ဒပ်ပၞာန် ကေုာံ ပရေၚ်အုပ်ဓုပ်မ္ဂး ပလးမုက်တိ (ဝါ) တိဍာ်ပယျဵုဒၞက်မန်ပိုယ် ဍန်ဂြေက်စှ်ေကၠုၚ်ဏောၚ်ဂှ် ဒးစွံသတိဇၞော်ဇၞော်ရ။

မုဟိုတ် ဒးအရေဝ်ဏံရော? ရံၚ်ကေတ် ပရေၚ်ချဳဒရာၚ် ပယျဵုဒၞက်တိဍာ် ဂကူညးတံ တ္ၚဲဏံမ္ဂး ပိုယ်ညာတ်ကေတ်မာန်ရ။ မွဲလ္ပါ်ဂှ် ပံၚ်တောဲကဵုအလဵုသဳဗၟာတုဲ ကၠောန် ပရေၚ်ပိုန်ဒြပ်၊ သြန်က္လိဂွံနၚ်နူပရေၚ် ပိုန်ဒြပ်ဂှ် ရာန်လွဟ်တုဲ ထံက်ပၚ် အာသၟာပၠန်ဂတး ဂကူညးတံလ္ၚဵုတံနွံရ။ မွဲလ္ပါ်ပၠန်ဂှ် ရပ်လွဟ်တုဲ ဗ္တိုက်မံၚ်သၞကီု သီုကဵု သၠဲပ္တိတ် မံၚ်တိဍာ် မပ္တံကဵု တိဍာ်မန် ကေုာံ ရးတၞၚ်သြဳရ။ အရီုမွဲလ္ပါ်ဂှ် လေဝ် ဒပ်ပၞာန် ကဝ်ဒူလေဝ် ဒက်ပ္တန် မံၚ်ဍုၚ်ဗၠးၜး ကရေၚ်တုဲ စန်ဒက်ကေတ်မံၚ် အသိၚ် ဇြဟတ် ပရေၚ်ညဳသၟဟ် အကြာ ကောန်ဂကူညးတံကီု သီုကဵု ဒက်မံၚ်မဟာမိတ် ကုအလဵုသဳသေံ သွက်ဂွံဆက်စၠောံ ပရေၚ်ပိုန်ဒြပ် သေံ ကေုာံ ကရေၚ် ဒေသ ပယျဵုဂမၠိုၚ်ရ။

ရံၚ်ကေတ် ကဵုဂုဏ်ဖဵု ပရေၚ်ပိုန်ဒြပ် ဂကူသေံတံမ္ဂး မၞုံကဵု ဂုဏ်ဖဵုဗွဲမဂၠိုၚ်တုဲ ဒတုဲဖဵုသီုၜါလ္ပါ် က္လိဂွံမာန် ညးတံ ညာတ်ကေတ်လဝ်နွံရ။ အနာဂတ် ကၟိန်ဍုၚ်ဗၟာ ဒးထ္ကးရောၚ်ဂှ် ဂကူသေံ တံညာတ်တုဲ လးလဝ်ဂၠံၚ်ဗီုပြၚ် မဟာမိတ် နွံပေၚ်ၚ်ရောၚ် ဟွံဒးတော်ဗေဒၚ်၊ ဟွံဒးပံက်မၚ်ဇေန် ဆဵုအာ ဍာန် အတိုၚ်ဏံရ။ၜိုန်ရ ဂကူဗၟာတံ စဵုဒၞာကဵု ကေတ်မံၚ်ပရေၚ်ဂီုကၠီု ပယျဵုဒၞက်တိဍာ် ဒၞာဲလ္ၚဵုနွံကီုလေဝ် ဟိုတ်နူ အသိၚ်ပၠန်ဂတးတံ ဇၞော်မောဝ် တဴတက်ပြးဂၠိုၚ်ကဵုဒေသတုဲ ပ္ဍဲအရာ ဂွံသောၚ်ပြသၞာ ပရေၚ်ဍုၚ်ကွာန်တ္ၚဲဏံဂှ် ဍေံလဇုဲအာမံၚ်ယျ။ မေန်အံၚ်လှာၚ် ပတှ်ေလဝ်ကြုက်ကဵုရုယှာတုဲ ကၠောန်ဗဒှ်ပေဲါရုဲမာဲ၊ ထိၚ်အာသၞောဝ် (၂၀၀၈) ဓဂၠိၚ်အယုက် အဝဵုပၞာန်ကီုလေဝ် သွက် ဂကူကြုက်မ္ဂး ရံၚ်ကဵု ဂုဏ်ဖဵု ပရေၚ်ပိုန်ဒြပ် ညးတံဟေၚ်ရ။

ကြုက်တံဂှ် မွဲလ္ပါ် ပ္တိတ်ပရဲ လ္တူရဲသၟာပၠန်ဂတး၊ မွဲလ္ပါ်ပၠန်လေဝ် ပ္တိတ်ပရဲလ္တူ အလဵုသဳမေန်အံၚ်လှာၚ် နွံရ။ သွက်ကၟိန်ဍုၚ်ဗၟာ အရာ ဂွံသောၚ်ပြသၞာ ပရေၚ်ဍုၚ်ကွာန် အနာဂတ်ဂှ် ကြုက်တံဟွံချပ် ဟွံစုတ်လဝ် ပ္ဍဲက္ဍဟ်ရောၚ်၊ တၚ်ဏံဂှ် မေန်အံၚ်လှာၚ် ဟွံညာတ်လဝ်ဏီရ။ ဟိုတ်နူ ကြအ်မံၚ်ကဵုအဝဵု ပရေၚ်ဒှ်သမ္မတတုဲ ထုဲဒၟံၚ်ကဵုပရေၚ်ပါ်ပရအ်အဝဵု ပ္ဍဲမၞိဟ်ညးတံဟေၚ်ရ။

ဟိုတ်ဂှ်ရ မန်ပိုယ်လေဝ် ယဝ်ရ ထုဲဒၟံၚ်ကဵုပရေၚ်ပိုန်ဒြပ်၊ ပရေၚ် စသုၚ်မံၚ်စံၚ်၊ ပရေၚ်ပေဲါသ္ဘၚ်နာနာ ကီုသီုကဵု ပရေၚ်သိုၚ်ဘုတ်ဘာ သ္ပကုသဵုကဵုဒါန်နာနာတုဲ ထုဲဒၟံၚ် ကဵုပရေၚ် ပစ္စုပ္ပန်တ္ၚဲဏံ သၟတ်တံ စိုတ်ဟွံလုပ်စ ကဵု ပရေၚ်ပၞာန် ပရေၚ်ဍုၚ်ကွာန်၊ ဟွံမၚ်မွဲ စဵုဒၞာလဝ် တိဍာ်ဇကုမ္ဂး ဗွဲမချိုတ်ဂှ် ဒးဘဲအန္တရာဲ ကဵုဂကူတၞဟ်တံ ဟေၚ်ရ။ ကာလ မေန်အံၚ်လှာၚ်တံ ထိၚ်ဒဝ် သၟာပၠန်ဂတး ဟွံမာန်မ္ဂး ညးတံဟွံကဵု ဆောံလေၚ်ပရေၚ် ဂကူညးတံတုဲ ကာလ ညးတံပံၚ်တောဲ ကဵုဇြဟတ် ပၠန်ဂတးဂကူတၞဟ်တံမ္ဂး တိဍာ်မန်ဂှ် စိုပ်အာ သၟဝ်တဲဂကူတၞဟ်တံတုဲ ဂကူမန်တံ ဟံသာဂၠုမတ်ၜါ ဂွံကလေၚ်စဴဍုၚ်မန်ဂှ် ဒးတတ် ဇွဂကူတၞဟ်တံတုဲမှ စိုပ်ဍုၚ်ဟံသာရ။ယဝ်ရ ပိုယ်တံ လ္ၚတ်ရံၚ် ဟိုတ် ပစ္စုပ္ပန်ဏံ မုဟိုတ်သၚ်မန်၊ သၟတ်မန် ကေုာံ ညးဍုၚ်ကွာန် ပိုယ်တံ စိုတ်ဟွံလုပ်စကဵု ပရေၚ် ပၠန်ဂတးရပ်လွဟ် ညံၚ်ခေတ် ကၠာ ကၠာ တေံရော?

ပိုယ်တံ ဆဵုကေတ် တၚ်ဍိုန်လျ (၃) သာ်ရ။

(၁) ပရေၚ်ပၠန်ဂတးမန်ပိုယ်ဂှ် သၞာံဗွဲမလအ်လး (၇၀ )သၞာံပြၚ် ကၠုၚ်တုဲ သွဟ်ဗွဲမပြဟ် ဟွံမံက်ဂတဝ်ကၠုၚ်ဂှ်ရ စိုတ်ဓါတ် ကောန်ဂကူတံ ဍောၚ်ၜိုတ်ကၠုၚ်။

(၂) ဟိုတ်နူဒးဂစာန်မံၚ် ပရေၚ် ဘဝပူဂိုလ် ကေုာံ ပရေၚ်ပိုန်ဒြပ် ဗွဲမသကာတ်မြဟ် ပ္ဍဲခေတ် ကာလဏံတုဲ အာရီုစိုတ်ဓာတ် ဆာန်ဂကူ လ္ပါ်ရပ်လွဟ်ဂှ် အောန်စှ်ေကၠုၚ်။

(၃) ဟိုတ်နူ က္ဍိုပ်သ္ကိုပ် ကေုာံ ဂကောံပၠန်ဂတး ကေတ်ဗၠးၜးဍုၚ်မန်ပိုယ်တံ သ္ဇိုၚ်ဂၠံၚ်တရဴ ဗျူဟာပြးဆာဲမံၚ်တုဲ ကောန်ရဲတဝ်ဝှာတံ ဒှ်ကၠုၚ်သၠေဟ်ပၟာ လ္တူ ဂၠံၚ်တရဴပၠန်ဂတး တုဲ စိုတ်ဓါတ် စှ်ေအာနွံရ။

ဆ္ဂး တၚ်ဏံဝွံ ဒှ်အန္တရာဲဇၞော်အိုတ် သွက်အနာဂတ် ဂကူမန်ပိုယ်ရ။ပ္ဍဲ ကဵုပရေၚ် ဍုၚ်ကွာန်ခေတ်လၟုဟ် "အသိၚ်အာဏာလွဟ် " (Military Might) ဂှ် ဒှ်အရာ ကိစ္စဇၞော် သွက်ဂွံ စဵုဒၞာ ကောန်ဂကူ ကေုာံ တိဍာ်ဇကုရ။ ရန်တၟံ ပၞာန်ဇေတ်တ်ဂှ် ကေတ်ဗၠးၜးဂကူ ကေုာံ စဵုဒၞာ ကေတ်ပရေၚ်ဂီုကၠီဂကူတုဲ အရေဝ်၊ လိက်ပတ်၊ ယေန်သၞာၚ် ညံၚ်ဟွံဂွံကၠေံဗ္ဒန်အာရ။ ယဝ်ရ ဂကူမန်ပိုယ် စိုတ်ဟွံလုပ်စ ကဵု ပရေၚ်ပၠန်ဂတး၊ ဇြဟတ်ရပ်လွဟ်ပၞာန်မန် ဟွံခိုၚ်ကၠိုက်မ္ဂး အခေါၚ်အရာ ဂကူ ကီု ဂီုကၠီ ဂကူ ဟွံမွဲတုဲ တိတ်ဗၠးနူ ဘဝဍိက်ဟွံမာန်ရ။ ယဝ်ရ ကၟာၚ်ဗဒၚ် (ဒပ်ပၞာန်ဇကု) ဟွံမွဲမ္ဂး ရုပ်ဝတ္ထု ဂကူမန်၊ လိက်ပတ်မန်တံ ၜိုန်ရ ဇၞော်မောဝ် တဴတက် ခိုဟ်မံၚ်လေဝ် ဒးဒုၚ် ပလီုပလာ်ထောံ လောဲလောဲတုဲ အဝဵုပၞာန် ကေုာံ ပရေၚ် ဍုၚ်ကွာန် အောန် မ္ဂး ဂကူမန် ညောန်ကဵု ဂွံကၠာဲ ကၠေံ ကၠက် အာ မာန်ရောၚ် ဒးညာတ်ကေတ်ဗွဲစၟတ်ရ။

နကဵု နဲကဲ မဟာဗျူဟာ ခေတ်တၟိ တ္ၚဲဏံမ္ဂး ပရေၚ် ပၠန်ဂတးရပ်လွဟ် မွဲဟေၚ် ဟွံသေၚ် ဒှ်အရာမကဵု သွဟ်ခိုဟ်အိုတ်။ ဆ္ဂး "ပရေၚ် ‘’ပၠန်ဂတးရပ်လွဟ်’’ဂှ် ဒှ်ကၟာၚ်ဗဒၚ် (Shield)" သွက်ဂွံ စဵုဒၞာဂကူရ။ ဟိုတ်ဂှ်ရ သွက်ဂွံစဵုဒၞာ ညံၚ်ဂကူ ဟွံဂွံကၠေံကၠက်၊ ညံၚ်ဂၠံၚ်တရဴဟံသာ ဂွံမံက်တၟးကၠုၚ်ဂှ် ပိုယ်တံ ဒးပံၚ်ဖစပ်ကေတ် ဇြဟတ် ၜါလ္ပါ်ရ။ ညးမၞုံကဵု စိုတ်ဓါတ်မိက်ဂွံရပ်လွဟ် တဝ်ဇၞးသွက်ဂကူ ကၠောန်ပၞာန်လေဝ် ကၠောန် (သွက်ဂွံစဵုဒၞာတိဍာ်)၊ ညးမၞုံကဵု စိုတ်ဓါတ် မိက်ဂွံကၠောန် ပရေၚ် ပညာ၊ လိက်ပတ်၊ ပရေၚ်ပိုန်ဒြပ်၊ ပရေၚ်သာသနာလေဝ် ဂစာန်ကၠောန် ‘’သွက်ဂွံသၠုၚ်ပ္တိုန်ကဆံၚ်ဂကူ’’။ သီုၜါလ္ပာ်ဏံ ယဝ်ရ ထံက်ပၚ်ရေၚ်သကအ်၊ ဒှ်မွဲဇြ ဟတ် မ္ဂး ဂၠံၚ်တရဴဟံသာ ဟွံဂၠုတုဲ ဂကူမန် ပွမ “ကၠာဲ− ကၠေံ− ကၠက်” အာ ဟွံမာန်ရ။

“လ္ပသာသ္ပံညိမန်”။ တိဍာ်ဇကု ကဵု ဇြဟတ်ပၞာန်ဇကု လၟုဟ်ဏံ နွံမံၚ်က္ဆံၚ်လဵုဂှ် မိက်ဂွံ ကဵုလ္ၚတ်ရံၚ်ကၠာညိ။ မုဒး ဗပေၚ်ဇြဟတ်နွံရော? ကၠာဟွံလ္ဇုဲ ဇၟာပ် ကောန်ဂကူမန် မုတာလျိုၚ်နွံရော? သၟာန်ဇကုဇကုကၠာညိ၊ တုဲမှ ဟီုဖျိညးတၞဟ်ညိ။ ကါလ ဟံသာဒးဂြးစပ်မှ ဂၠုမတ်ၜါ လျးအရံၚ်ဟံသာဟွံမွဲရ။ သွက်ဂွံ ကလေၚ်စဴဍုၚ်မန် ၚ္ၚုဟ်က္တဵုအိုတ်ညိမန်။ လ္ပရပ်မံၚ်အလံၚ် လ္ပတံၚ်မာန ဘဝဂကူမန်ပိုယ် ဍာ်စိုပ်မံၚ်ကအ်ယျ ကဵုဂွံသတိအိုတ်ညိမန်။

လိက်ပရေၚ် တၚ်သ္ၚဳဂၠိပ် ဗွဲသၟဝ်ဏံ ဍေံဒှ်အာ လိက်ပရေၚ်မနွံကဵု "လျးပညာ" ကေုာံ "သၠုၚ်ပ္တိုန်စိုတ်ဓာတ်" မွဲပိုဒ်ဍောတ်ရ။ တၚ်သ္ၚဳဂၠိပ် လိက်ဏံဝွံ ဍေံဒှ်သ္ဇိုၚ် (Foundation) သွက်ညးဗှ်လိက်တံ ဂွံညာတ်ကေတ် က္ဍိုပ်လိက် "ဂၠံၚ်တရဴဟံသာ ဂၠုမံၚ်ယျဏး"

၁။ အကာဲအရာဂကူမန် — (ဒးဆဵုမံၚ် အခါအန္တရာဲ): ရံၚ်ကေတ် အကာဲ အရာဂကူမန်ပိုယ် တ္ၚဲဏံမ္ဂး ညံၚ်ရဴမတ်ဗြဲဂၠု ဒမၠုအခိၚ်ဗ္တံ ဟွံမွဲကဵုလျးအရံၚ်ရ။ ဂၠံၚ်တရဴဟံသာ ဂွံကလေၚ်စဴဍုၚ်မန်ဂှ် ဒှ်တၚ် (Challenge) ကော်ချဴ ဇၞော်မွဲ သွက်ကောန်ဂကူမန်တံ ဒးတတ်ကၠောံရ။ ယဝ်ရ လျးအရံၚ် (ပညာ ကေုာံ ဗျူဟာ) ဟွံမွဲမ္ဂး ဂကူမန်ပိုယ် ဒးဗၠိုက်တၞီအာ ပ္ဍဲဗ္တံမဂၠု ဒမၠုဏံမာန်ရ။

၂။ မဟာဗျူဟာဂကူတၞဟ်တံ — (ပရေၚ်စန်ဒက် ကေုာံ သၠဲတိဍာ်): ဂကူတၞဟ်တံတံ နွံကဵုဗျူဟာ မနွံကဵုအသိၚ် “ၜါလ္ပါ်”။ မွဲလ္ပါ်ဂှ် စန်ဒက်မံၚ် ဇြဟတ် ညဳသၟဟ် ကောန်ဂကူညးတံ ဗွဲမခိုၚ်ကၠိုက် မွဲလ္ပါ်ဂှ် သၠဲပ္တိတ်မံၚ် တိဍာ်ဇကု (ပယျဵုမန်) အတိုၚ်သၞောဝ်တိဍာ် ညးတံဓဇေက်လဝ်ရ။ တုဲပၠန် နကဵုလျးမတ် ဍုၚ်ဗၠးၜး (ကဝ်ဒူလေ) ဂှ် ဒက်မဟာမိတ် ကုဍုၚ်သေံ သွက်ဂွံကၠောန် ပရေၚ်ပိုန်ဒြပ် ကေုာံ ပရေၚ်ဂီုကၠီုနွံရ။

၃။ အကာဲအရာသၞ — (ပၞာန် ကြအ်အဝဵု): မေန်အံၚ်လှာၚ်တံ ကြအ်မံၚ်ကဵုအဝဵုတုဲ ထုဲဒၟံၚ်ကဵုပရေၚ်ပါ်ပရအ်အဝဵု အကြာမၞိဟ်ညးတံရ။ အကာဲ အရာဏံဂှ် ဒှ်အခိၚ်ခိုဟ် သွက်သၟာပၠန်ဂတးတံ ဂွံတဴတက်ကၠုၚ် ဂၠိုၚ်ကဵုဒေသ။ ယဝ်ရ မန်ပိုယ် ဟွံကေတ်အခေါၚ်ဏံမ္ဂး တိဍာ်မန်ပိုယ်( ဗၟာ ) ဟွံသီမ္ဂး ဂကူတၞဟ်တံ သီကေတ် အာမာန်ရ။

၄။ ဓရ်သတိသွက်မန် — (လ္ပထုဲမံၚ် ဆပစ္စုပ္ပန်): လိက်ပရေၚ်ဏံ ကဵုသတိဇၞော်ဇၞော် ဒဒှ်ရ ကောန်ဂကူမန်တံ လ္ပထုဲမံၚ်ဆ ပရေၚ်စသုၚ်၊ ပရေၚ်ပေဲါသ္ဘၚ်၊ ကေုာံ ပရေၚ် သိုၚ်ဘုတ်ဘာ ဒက်ကျာ် မွဲဓဝ်ညိ။ အရာ တံဏံဂှ် ဒှ်ယေန်သၞာၚ် ကါကုသဵု ကီုလေဝ် ယဝ်ရ ပရေၚ်ပၞာန် (ဇြဟတ်စဵုဒၞာ) ကေုာံ ပရေၚ် မၚ်မွဲတိဍာ် ဟွံမွဲ စိုပ်မွဲတ္ၚဲ မွဲအခိၚ်မ္ဂး ဘုတ်ဘာတံဏံလေဝ် ဒးဒုၚ်ပလီုပလာ်ထောံ မာန်ရ။

၅။ တၚ်နၚ်လက္ကရဴ — "ဍာ်စိုပ်မံၚ်ကအ်ယျ" ဒှ်မအရေဝ် မကဵုဓရ်သတိဇၞော်ကဵုဇြဟတ် သွက်ဂကူမန် ဂွံၚ္ၚုဟ်က္တဵုတုဲ ကလေၚ် စွံၚုဟ်မး လ္တူ တာ လျိုၚ်ဂကူ။ ဍေံဗၟံက်ထ္ၜးကဵု အကာဲအရာ အန္တရာဲ မစိုပ်ကၠုၚ်ဒၟံၚ် ဂတမတ်တုဲ ဒးကေတ်တာလျိုၚ် ဗွဲမပြဟ်ရ။

လိက်ပရေၚ်ဏံ မၞုံကဵုအာရီုဆန္ဒ (Emotion) ကေုာံ တၚ်နၚ် (Fact) နှဴရဴမံၚ်တုဲ ဒှ်လိက်ပရေၚ် မကဵုဇြဟတ်ကုညးဗှ်တံ ဗွဲမလောဲသွာရ။ လိက်ပရေၚ်သ္ၚဳဂၠိပ်မွဲပိုဒ်ဍောတ်ဏံ၊ ဍေံဒှ် "လိက်ကော်ခဴ" (Call to Action) သွက်ကောန်ဂကူမန်တံ ဂွံကလေၚ်စွံစိုတ် လ္တူဂၠံၚ်တရဴပၠန်ဂတး ကေုာံ ပရေၚ်ဂီုကၠီု တိဍာ်ဇကုမာန်ရအဴ။

ဨရာမာန် (ရးယူရောပ်)